जनकपुरधाम, १३ असार – धनुषाको जनकपुरधाम उपमहानगरपालिका–९ स्थित थापा चौकको एक होटलबाट प्रहरीले पेस्तोल र गोलीसहित दुई युवकलाई पक्राउ गरेको छ।

जिल्ला प्रहरी कार्यालय धनुषाबाट खटिएको टोलीले गोप्य सूचनाका आधारमा होटलमा खाना खान आएका दुई युवालाई नियन्त्रणमा लिएको हो। पक्राउ पर्नेमा धनुषाको मुखियापट्टि मुसहरनियाँ गाउँपालिका–४ निवासी २० वर्षीय अमन यादव र हंसपुर नगरपालिका–६ सोनीगामा निवासी १८ वर्षीय सुधिर मुखिया रहेका छन्।

जिल्ला प्रहरी कार्यालय धनुषाका निमित्त प्रवक्ता प्रहरी निरीक्षक मनोज यादवका अनुसार पक्राउ परेका दुवै जनाको साथबाट एक थान पेस्तोल, एउटा म्यागजिन, ९ एमएम केएफ लेखिएको एक राउन्ड गोली तथा ७.६५ एमएम केएफ लेखिएका तीन राउन्ड गोली बरामद गरिएको छ।

घटनाका सम्बन्धमा पक्राउ परेका दुवै जनामाथि थप अनुसन्धान भइरहेको प्रहरीले जनाएको छ।