चिर्खाङमा चट्याङ लागेर ३९ वर्षीया महिलाको मृत्यु

किमाथाङ्का (सङ्खुवासभा), १४ असार — सङ्खुवासभाको मकालु गाउँपालिका–१ चिर्खाङमा चट्याङ लागेर एक महिलाको मृत्यु भएको छ।

जिल्ला प्रहरी कार्यालय सङ्खुवासभाका सूचना अधिकारी धनबहादुर राजवंशीका अनुसार आज परेको वर्षा र हुरीसँगै आएको चट्याङ लागेर ३९ वर्षीया कुमारी राईको मृत्यु भएको हो।

घरमा रहेको मिटर बक्स बन्द गर्ने क्रममा चट्याङ लाग्दा राई गम्भीर घाइते हुनुभएको थियो। उपचारका लागि प्राथमिक स्वास्थ्य केन्द्र नुमतर्फ ल्याउँदै गर्दा बाटोमै उहाँको मृत्यु भएको प्रहरीले जनाएको छ।

राईको शव जिल्ला अस्पताल सङ्खुवासभा ल्याइएको छ। शवपरीक्षणपछि परिवारलाई जिम्मा लगाइने प्रहरीले जनाएको छ।