नेपालगञ्ज, असार १५: बाँके प्रहरीले आफ्नै सहोदर दाजुको हत्या गरेको आरोपमा कोहलपुर नगरपालिका–४ गोहुवाका २० वर्षीय विनोद चौधरीलाई पक्राउ गरेको छ।

जिल्ला प्रहरी कार्यालय बाँकेका प्रहरी निरीक्षक जीवराज थापाका अनुसार आइतबार साँझ २६ वर्षीय मनोज चौधरीको हत्या गरी शव नहरमा फालेर फरार भएका विनोदलाई कोहलपुर नगरपालिका–१५ चन्हवाबाट पक्राउ गरिएको हो।

प्रहरीका अनुसार कुटपिटका क्रममा मनोजको मृत्यु भएको प्रारम्भिक अनुसन्धानबाट खुलेको छ। घटनाबारे थप अनुसन्धान भइरहेको प्रहरीले जनाएको छ।

मृतकको शव पोस्टमार्टमका लागि भेरी अस्पताल, नेपालगञ्जमा राखिएको छ। पक्राउ परेका विनोदलाई म्याद थपका लागि जिल्ला अदालत, बाँकेमा उपस्थित गराइएको प्रहरीले जनाएको छ।