बुधबार भेनेजुएलामा गएको दुई शक्तिशाली भूकम्पमा मृत्यु हुनेको सङ्ख्या ९२० पुगेको छ। मृतकमध्ये विभिन्न देशका नागरिकसमेत रहेको सम्बन्धित सरकारहरूले पुष्टि गरेका छन्।

हालसम्म प्राप्त विवरणअनुसार पोर्चुगलका १५ नागरिकको मृत्यु भएको छ। यसअघि पोर्चुगिज विदेश मन्त्रालयले नौ जनाको मृत्यु र ५६ जना बेपत्ता रहेको जानकारी दिएको थियो।

चीनको सरकारी प्रसारक सिसीटिभीका अनुसार काराकासस्थित चिनियाँ दूतावासले सात चिनियाँ नागरिकको मृत्यु भएको पुष्टि गरेको छ। दूतावासले भेनेजुएलामा रहेका आफ्ना नागरिकलाई पराकम्पन तथा सम्भावित जोखिमप्रति सतर्क रहन आग्रह गरेको छ।

स्पेनले कम्तीमा पाँच नागरिकको मृत्यु भएको र ११९ जना अझै बेपत्ता रहेको जनाएको छ। भग्नावशेषबाट १४ जनालाई जीवित उद्धार गरिएको स्पेनी अधिकारीहरूले बताएका छन्। स्पेनले राहतका लागि १० लाख युरो सहयोग घोषणा गरेको छ।

आधिकारिक तथ्याङ्कअनुसार भेनेजुएलामा करिब एक लाख ४७ हजार स्पेनी नागरिक बसोबास गर्दै आएका छन्।

ब्राजिलको विदेश मन्त्रालयले आफ्ना दुई नागरिक—एक पुरुष र एक महिलाको मृत्यु भएको पुष्टि गर्दै परिवारलाई कन्सुलर सहायता उपलब्ध गराइरहेको जनाएको छ।

इटालीको विदेश मन्त्रालयका अनुसार काराकासमा जन्मिएका तर इटालियन र भेनेजुएली दुवै नागरिकता भएका ५० वर्षीय एक पुरुषको मृत्यु भएको छ। इटालीका करिब एक लाख ७० हजार राहदानीवाहक भेनेजुएलामा बसोबास गर्दै आएको अनुमान गरिएको छ।