हल गोरु पाल्ने कृषकलाई गल्याङ नगरपालिकाको रु पाँच हजार प्रोत्साहन अनुदान

वालिङ (स्याङ्जा), १६ असार : स्याङ्जाको गल्याङ नगरपालिकाले हल गोरु पाल्ने कृषकलाई प्रोत्साहनस्वरूप प्रतिकृषक रु पाँच हजारका दरले अनुदान उपलब्ध गराएको छ।

बढ्दो यान्त्रिकीकरणका कारण हल गोरु पाल्ने परम्परा घट्दै गएपछि कृषकलाई यसतर्फ आकर्षित गर्न नगरपालिकाले चालु आर्थिक वर्ष २०८२/८३ मा कृषक प्रोत्साहन अनुदान कार्यक्रम सञ्चालन गरेको हो।

नगरपालिकाका प्रमुख प्रशासकीय अधिकृत युवराज अधिकारीका अनुसार ११५ कृषकबाट ११६ हल गोरुको आवेदन परेपछि सोही आधारमा प्रतिकृषक रु पाँच हजारका दरले प्रोत्साहन रकम वितरण गरिएको हो।

नगरपालिकाले यान्त्रिक हलो (पावर टिलर) चलाउन दक्ष जनशक्तिको अभाव, ग्रामीण क्षेत्रमा इन्धनको सहज उपलब्धता नहुनु तथा बिग्रिएपछि मर्मतमा समस्या हुने अवस्थालाई ध्यानमा राख्दै हल गोरु संरक्षण र प्रवर्द्धनका लागि अनुदान कार्यक्रम ल्याएको जनाएको छ।

पशु सेवा शाखाका प्राविधिक महादेव बनका अनुसार नगरपालिकाले सूचना जारी गरी हल गोरु पाल्ने कृषकसँग आवेदन मागेको थियो। आवेदनका साथ गोरुको बीमा गरेको प्रमाण र गोठमा रहेको हल गोरुको तस्बिर पेश गर्नुपर्ने व्यवस्था गरिएको थियो। त्यसपछि नगरपालिकाले स्थलगत अनुगमन गरी योग्य कृषकको खातामा अनुदान रकम जम्मा गरेको हो।

उहाँका अनुसार नगरपालिकाभित्र हल गोरुको संख्या आवेदनमा उल्लेख भएकोभन्दा बढी भए पनि केही कृषकले जानकारी नपाउँदा वा आवेदन नदिँदा अनुदानबाट वञ्चित भएका हुन सक्छन्।

नगरपालिकाले आगामी आर्थिक वर्ष २०८३/८४ मा पनि यो कार्यक्रमलाई निरन्तरता दिने जनाएको छ। चालु आर्थिक वर्षमा अनुदान नपाएका हल गोरु पाल्ने कृषकलाई आगामी वर्ष प्राथमिकतामा राखेर प्रोत्साहन रकम उपलब्ध गराइने नगरपालिकाले जनाएको छ।

एक्सप्रेस

सम्बन्धित खबर

पुराना अनुहारले कांग्रेस संकटमा, नयाँ नेतृत्व अपरिहार्य : उमेश श्रेष्ठ

विराटनगर । नेपाली कांग्रेसका कोषाध्यक्ष उमेश श्रेष्ठले कांग्रेसभित्र अब पूरानो शैली र अनुहारभन्दा नयाँ, पढेलेखेका, उद्यमशील र विषयविज्ञ युवालाई नेतृत्वमा ल्याउनुपर्ने आवश्यकता औंल्याएका छन् । ने...