फिक्कल (इलाम), १४ असारः लगातारको वर्षासँगै आएको पहिरोका कारण मेची राजमार्गअन्तर्गत इलामको गोलाखर्क–राजदुवाली सडकखण्ड अवरुद्ध भएको छ।

इलाम नगरपालिका–९ स्थित माईखोलामा सडकमाथिबाट लेदोसहितको पहिरो खसेपछि सडक पूर्ण रूपमा बन्द भएको प्रमुख जिल्ला अधिकारी लक्ष्मण ढकालले जानकारी दिनुभयो। उहाँका अनुसार उक्त सडकखण्डमा यसअघि पनि पटक–पटक लेदोसहितको पहिरो झर्ने र सवारी आवागमन अवरुद्ध हुने समस्या दोहोरिँदै आएको छ।

सडक खुलाउने प्रयासस्वरूप बिहानैदेखि पहिरो पन्छाउने काम भइरहेको छ। हाल साना सवारीसाधनलाई एकतर्फी रूपमा सञ्चालन गराउने तयारी भइरहेको भए पनि लगातार लेदो झरिरहेकाले ठूला सवारीसाधन सञ्चालनमा आउन भने केही समय लाग्ने जनाइएको छ।

“गएरातिदेखि लेदोसहितको पहिरो झरेकाले सडक पूर्ण रूपमा अवरुद्ध छ। साना सवारीसाधन एकतर्फी रूपमा सञ्चालन गराउन बिहानैदेखि पहिरो पन्छाउने काम भइरहेको छ। सडक पूर्ण रूपमा सञ्चालनमा आउन केही समय लाग्न सक्छ,” प्रमुख जिल्ला अधिकारी ढकालले भन्नुभयो।

यसैबीच, मेची राजमार्गअन्तर्गत रोङ गाउँपालिका–४ स्थित इलाम–झापा सीमाक्षेत्रमा ढिस्को र दुईवटा रूख ढलेपछि अर्को सडकखण्ड पनि अवरुद्ध भएको जिल्ला प्रहरी कार्यालय इलामले जनाएको छ। प्रहरी उपरीक्षक कुलदीप चन्दका अनुसार उक्त स्थानमा पनि सडक खुलाउने प्रयास जारी छ।

सडक अवरुद्ध हुँदा इलाम, पाँचथर, ताप्लेजुङ र झापाका यात्रु प्रत्यक्ष रूपमा प्रभावित भएका छन्। इलाम, पाँचथर र ताप्लेजुङबाट झापा तथा झापाबाट पूर्वी पहाडी जिल्लातर्फ जाने सवारीसाधन बीच बाटोमै रोकिँदा यात्रु अलपत्र परेका छन्।