काठमाडौँ, १४ असारः नेपालमा मनसुन क्रमशः सक्रिय बन्दै गएसँगै आगामी असार १६ र १७ गते देशका अधिकांश क्षेत्रमा भारीदेखि धेरै भारी वर्षा हुने सम्भावना रहेको छ। जल तथा मौसम पूर्वानुमान महाशाखाले आज विशेष मौसम बुलेटिन जारी गर्दै सर्वसाधारणलाई उच्च सतर्कता अपनाउन आग्रह गरेको हो।

महाशाखाका अनुसार मधेस, कोशी, बागमती, गण्डकी, लुम्बिनी र सुदूरपश्चिम प्रदेशका पहाडी तथा तराईका केही स्थानमा मेघगर्जन, चट्याङसहित भारी वर्षा हुने तथा एक–दुई स्थानमा अत्यधिक वर्षा हुन सक्ने अनुमान गरिएको छ। साथै, देशका पहाडी तथा तराईका अधिकांश र हिमाली क्षेत्रका केही स्थानमा मध्यम वर्षाको सम्भावना रहेको छ।

बङ्गालको खाडीमा विकसित न्यून चापीय प्रणालीका कारण नेपालतर्फ जलवाष्पयुक्त हावाको प्रवाह बढ्दै गएको र यसकै प्रभावले मनसुन देशका बाँकी क्षेत्रमा समेत विस्तार हुने महाशाखाले जनाएको छ।

लगातारको वर्षासँगै बाढी, पहिरो, भूक्षय तथा गेग्र्यान बहावको जोखिम बढ्न सक्ने, तराई तथा सहरी क्षेत्रमा डुबान हुन सक्ने र नदी तथा खोलामा पानीको सतह उल्लेख्य रूपमा बढ्न सक्ने भएकाले विशेष सावधानी अपनाउन महाशाखाले आग्रह गरेको छ।

यस्तै, प्रतिकूल मौसमका कारण दैनिक जनजीवन, कृषि, स्वास्थ्य, पर्यटन, नदी किनारका निर्माण कार्य तथा सडक र हवाई यातायात प्रभावित हुन सक्ने भएकाले सम्बन्धित निकाय र सर्वसाधारणलाई आवश्यक पूर्वतयारी गर्न अनुरोध गरिएको छ।