विद्यालयमा आर्थिक अनियमितताको आरोप, अभिभावकद्वारा छानबिनको माग

अडियोमा सुन्नुहोस्

मोरङ, रमाइलो — मोरङ जिल्लाको रमाइलोस्थित श्री जनसेवा माध्यमिक विद्यालयमा आर्थिक अनियमितता भएको भन्दै अभिभावकले विद्यालय प्रशासनसँग छानबिनको माग गरेका छन्।

विद्यालय व्यवस्थापन तथा प्रधानाध्यापकलाई सम्बोधन गर्दै लेखिएको निवेदनमा कक्षा ८ मा अध्ययनरत विद्यार्थीहरूबाट विभिन्न शीर्षकमा रकम उठाइएको तर सो रकमको स्पष्ट विवरण नदिएको आरोप लगाइएको छ। अभिभावकले विद्यालयले लिएको शुल्क, खाजा खर्च तथा अन्य आर्थिक कारोबारको पारदर्शी हिसाब सार्वजनिक गर्न माग गरेका छन्।

निवेदनमा विद्यालयले अभिभावकसँग समन्वय नगरी रकम असुली गरेको र त्यसले अभिभावकहरूमा असन्तुष्टि बढाएको उल्लेख गरिएको छ। साथै, सम्बन्धित विषयमा चाँडो छानबिन गरी दोषीमाथि कारबाही गर्न माग गरिएको छ।

अभिभावकहरूले समस्या समाधान नभए थप कदम चाल्न बाध्य हुने चेतावनी समेत दिएका छन्। विद्यालय प्रशासनले भने यस विषयमा औपचारिक प्रतिक्रिया दिएको छैन।