काठमाडौं, असार १३: हाल कमजोर रहेको मनसुन अबको हप्तादेखि उल्लेखनीय रूपमा सक्रिय हुने र देशका अधिकांश क्षेत्रमा वर्षा हुने जल तथा मौसम विज्ञान विभागले जनाएको छ।

विभागका मौसमविद् रोजन लामिछानेका अनुसार अहिले पनि केही स्थानमा भारी वर्षा भइरहेको छ भने मङ्गलबारपछि मनसुन थप सक्रिय भई केही क्षेत्रमा धेरै भारी वर्षासमेत हुने सम्भावना छ।

आज राति कोशी प्रदेशका पहाडी तथा तराईका एक–दुई स्थानमा भारी वर्षाको सम्भावना रहेको छ। भोलि (आइतबार) राति पनि कोशी प्रदेशका पहाडी र तराई क्षेत्रमा भारी वर्षा हुन सक्ने विभागले जनाएको छ। साथै, कोशी प्रदेशको तराई र मधेस प्रदेशका केही स्थानमा हावाहुरी चल्ने सम्भावना रहेको छ।

यस्तै, आइतबार सुदूरपश्चिम प्रदेशको तराई तथा लुम्बिनी प्रदेशको पश्चिमी तराईका केही स्थानमा तातो लहर (हिटवेभ) को सम्भावना रहेको विभागले जनाएको छ।

सोमबारदेखि भने देशभर मनसुनको प्रभाव अझ बढ्नेछ। देशभर सामान्यदेखि पूर्ण बदली रहने, पहाडी तथा हिमाली क्षेत्रका केही स्थानमा मेघगर्जन, चट्याङसहित मध्यम वर्षा तथा हिमाली क्षेत्रमा हिमपात हुने सम्भावना छ। तराईका केही स्थानमा पनि मेघगर्जन र चट्याङसहित मध्यम वर्षा हुने अनुमान गरिएको छ।

कोशी प्रदेशका पहाडी तथा तराईका एक–दुई स्थानमा भारी वर्षा हुन सक्नेछ भने कोशी प्रदेशको तराई र मधेस प्रदेशका केही स्थानमा हावाहुरीको सम्भावना पनि रहेको विभागले जनाएको छ।

सोमबार रातिदेखि मनसुन थप सक्रिय भई कोशी प्रदेशका केही स्थानमा भारीदेखि धेरै भारी वर्षा हुने सम्भावना छ। मधेस प्रदेशका एक–दुई स्थानमा पनि भारी वर्षा हुन सक्ने जनाइएको छ। साथै, कोशी, बागमती, गण्डकी र लुम्बिनी प्रदेशका तराई क्षेत्र तथा मधेस प्रदेशका केही स्थानमा हावाहुरी चल्न सक्ने विभागको पूर्वानुमान छ।

मौसमविद् धर्मराज उप्रेतीका अनुसार असार १४ देखि १७ गतेसम्म मनसुन थप सक्रिय हुने र असार १६ देखि १८ गतेसम्म व्यापक वर्षा भई धान रोपाइँका लागि अनुकूल वातावरण बन्ने अपेक्षा गरिएको छ। उहाँका अनुसार सोमबारपछि बाँकेदेखि कञ्चनपुरसम्म पश्चिम नेपालका अधिकांश क्षेत्रमा पनि राम्रो वर्षा हुनेछ।