कास्की, १३ असार : पोखरामा आजदेखि तेस्रो संस्करणको गण्डकी प्रदेशस्तरीय महिला टी–२० क्रिकेट प्रतियोगिता सुरु भएको छ। महिला क्रिकेटको विकास र नयाँ प्रतिभा उत्पादन गर्ने उद्देश्यले प्रादेशिक क्रिकेट सङ्घ गण्डकीको आयोजना तथा प्रदेश खेलकुद परिषद्को सहकार्यमा प्रतियोगिता सञ्चालन गरिएको हो।

पोखरा रङ्गशालास्थित क्रिकेट मैदानमा भएको उद्घाटन खेलमा स्याङ्जाले नवलपुरलाई ९६ रनले पराजित गर्दै प्रतियोगितामा विजयी सुरुआत गरेको छ।

टस जितेर पहिले ब्याटिङ गरेको स्याङ्जाले निर्धारित २० ओभरमा आठ विकेट गुमाउँदै १२७ रन बनायो। टोलीका लागि सलिना सेनले सर्वाधिक ४० रन बनाइन् भने अरमिना अधिकारीले ३० र सिमाना केसीले १२ रनको योगदान दिइन्। रञ्जना साउद पाँच तथा अन्तिमा विश्वकर्मा छ रनमा अविजित रहे। स्याङ्जाले अतिरिक्तबाट २७ रन प्राप्त गरेको थियो।

नवलपुरका श्रेया शर्माले चार ओभरमा २५ रन खर्चेर तीन विकेट लिइन्। निहारिका शर्माले दुई तथा आयुष्मा चापागाईंले एक विकेट हात पारिन्।

१२८ रनको लक्ष्य पछ्याएको नवलपुर ९ ओभर ५ बलमा ३१ रनमै समेटियो। नवलपुरका कुनै पनि ब्याटरले दोहोरो अंक जोड्न सकेनन् भने अतिरिक्तबाट आएको १४ रन नै टोलीको दोस्रो ठूलो स्कोर रह्यो।

स्याङ्जाको जितमा सिमाना केसी र निरु जीटीले समान तीन–तीन विकेट लिए भने कुसुम गोदारले दुई र रञ्जना साउदले एक विकेट झारे। ब्याटिङमा १२ रन र बलिङमा तीन विकेट लिएकी सिमाना केसी ‘प्लेयर अफ द म्याच’ घोषित भइन्।

प्रतियोगितामा कास्की, स्याङ्जा, नवलपुर, बागलुङ र पर्वतका पाँच टोलीको सहभागिता रहेको छ। प्रतियोगिता ‘राउण्ड रोबिन लिग’ प्रणालीमा सञ्चालन हुने आयोजक गण्डकी प्रादेशिक क्रिकेट सङ्घका अध्यक्ष सञ्जयकान्त सिग्देलले जानकारी दिनुभयो।

उहाँका अनुसार प्रतियोगिताले महिला क्रिकेटको स्तर उकास्न, खेलाडीको क्षमता अभिवृद्धि गर्न तथा नयाँ प्रतिभा उत्पादनमा सहयोग पुर्‍याउने विश्वास गरिएको छ।

प्रतियोगिताको उद्घाटन गर्दै प्रदेश खेलकुद परिषद् गण्डकीका सदस्य रवीन्द्रबहादुर प्रजुले खेलकुद क्षेत्रको बजेट घट्दै जानु चिन्ताको विषय भएको बताउँदै खेलाडीलाई अनुशासित, प्रतिस्पर्धी र खेलभावनासहित उत्कृष्ट प्रदर्शन गर्न आग्रह गर्नुभयो।

प्रतियोगिता असार १७ गतेसम्म सञ्चालन हुनेछ।