काठमाडौं, १३ असार: आकर्षक वैदेशिक रोजगारीको प्रलोभन देखाएर विभिन्न व्यक्तिबाट लाखौँ रुपैयाँ ठगी गरेको आरोपमा प्रहरीले तीन जनालाई पक्राउ गरेको छ।

नेपाल प्रहरीको केन्द्रीय समाचारकक्षका अनुसार पक्राउ पर्नेमा बाराका गगनबहादुर स्याङ्तान, सर्लाहीका निर्जल बस्नेत र दाङका बलबहादुर चन्द ठकुरी रहेका छन्।

प्रहरीका अनुसार गगनबहादुरले माल्दिभ्स पठाइदिने भन्दै चार जनाबाट रु ४ लाख ३० हजार, निर्जलले मलेसिया पठाइदिने भन्दै एक जनाबाट रु ३ लाख ९० हजार र बलबहादुरले क्रोएसिया पठाइदिने भन्दै एक जनाबाट रु १ लाख उठाएर सम्पर्कविहीन भएका थिए।

पीडितहरूको उजुरीपछि काठमाडौं उपत्यका अपराध अनुसन्धान कार्यालय, टेकुको टोलीले उनीहरूलाई काठमाडौं र ललितपुरबाट पक्राउ गरेको हो।

पक्राउ परेका गगनबहादुरलाई थप अनुसन्धानका लागि जिल्ला प्रहरी परिसर काठमाडौं पठाइएको छ भने निर्जल र बलबहादुरलाई कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।

यसैबीच, बैंकिङ कसुर मुद्दाका फरार प्रतिवादी इलामको देउमाई नगरपालिका–२ निवासी कृष्णकुमार राई पनि पक्राउ परेका छन्।

जिल्ला अदालत इलामबाट पक्राउ अनुमति जारी भएपछि फरार रहेका राईलाई काठमाडौं–१४ बल्खुबाट पक्राउ गरिएको प्रहरीले जनाएको छ। उनलाई आवश्यक अनुसन्धान तथा कानुनी कारबाहीका लागि जिल्ला प्रहरी कार्यालय इलाम पठाइएको छ।