जनकपुरधाम, १४ असारः मधेस प्रदेशमा जारी निको कप महिला टी-२० राष्ट्रिय क्रिकेट प्रतियोगिताको उपाधिका लागि आज नेपाल एपिएफ क्लब र कोशी प्रदेशबीच प्रतिस्पर्धा हुँदैछ।

पर्साको वीरगञ्जस्थित टीबी शाह क्रिकेट मैदानमा हुने फाइनल खेलमा दुवै टोली उपाधि जित्ने लक्ष्यका साथ मैदान उत्रनेछन्।

कोशी प्रदेशले सेमिफाइनलमा बागमती प्रदेशलाई आठ रनले पराजित गर्दै फाइनलमा स्थान बनाएको हो। यता, नेपाल एपिएफ क्लब र लुम्बिनी प्रदेशबीचको सेमिफाइनल खेल वर्षाका कारण प्रभावित भएपछि नेट रनरेटका आधारमा एपिएफ फाइनलमा पुगेको हो।

मधेस प्रदेश सरकारको खेलकुद तथा समाज कल्याण मन्त्रालय, मधेस खेलकुद परिषद् र नेपाल खेलकुद महासङ्घको संयुक्त आयोजनामा भइरहेको प्रतियोगितामा सात प्रदेश र विभागीय टोली नेपाल एपिएफ क्लब गरी आठ टोलीको सहभागिता रहेको छ।