काठमाडौँ, १४ असार — उपराष्ट्रपति रामसहायप्रसाद यादवले शिक्षालाई अनुसन्धान, नवप्रवर्तन र डिजिटल प्रविधिसँग एकीकृत गर्नुपर्नेमा जोड दिनुभएको छ।

मदन भण्डारी मेमोरियल कलेजको रजत महोत्सवका अवसरमा आज काठमाडौँमा आयोजित समारोहलाई सम्बोधन गर्दै उहाँले कृत्रिम बौद्धिकता (एआई) र आधुनिक प्रविधिलाई विद्यालयदेखि विश्वविद्यालय तहसम्मको शिक्षासँग जोड्न आवश्यक रहेको बताउनुभयो।

उहाँले शिक्षा क्षेत्रमा अपेक्षित नवप्रवर्तनको कमी रहेको उल्लेख गर्दै डिजिटल शिक्षामार्फत त्यसको परिपूर्ति गर्नुपर्ने धारणा राख्नुभयो। शिक्षालाई अनुशासन, अनुसन्धान र नवप्रवर्तनसँग समेटेर अघि बढाउनुपर्ने उहाँको भनाइ थियो।

उपराष्ट्रपति यादवले भन्नुभयो, “शिक्षाले विनम्रता, अनुशासन र सामाजिक उत्तरदायित्वको भावना विकास गर्छ। बहुजातीय समाजमा शिक्षा नै सद्भावको आधार हो। राष्ट्र निर्माणमा शिक्षाको महत्वपूर्ण भूमिका रहन्छ। भविष्य निर्माणका लागि शिक्षा क्षेत्रमा सुधार आवश्यक छ। युवालाई स्वरोजगारतर्फ उन्मुख बनाउन शिक्षा सहयोगी हुनुपर्छ। केवल प्रमाणपत्र प्राप्तिमा सीमित नभई गुणस्तरीय शिक्षामा जोड दिनुपर्छ। शिक्षक राष्ट्र निर्माणका अभियन्ता हुन् र विश्वविद्यालयलाई अनुसन्धानको केन्द्रका रूपमा विकास गर्नुपर्छ।”

सो अवसरमा कलेज व्यवस्थापन समितिका अध्यक्ष महेन्द्रबहादुर पाण्डेले सुलभ र सहज रूपमा गुणस्तरीय शिक्षा प्रदान गर्ने उद्देश्यलाई कलेजले निरन्तरता दिइरहेको बताउँदै आगामी दिनमा संस्थालाई अझ उत्कृष्ट शैक्षिक प्रतिष्ठानका रूपमा विकास गर्ने प्रतिबद्धता व्यक्त गर्नुभयो।

त्यसैगरी, त्रिभुवन विश्वविद्यालयका पूर्वउपकुलपति दीपक अर्यालले त्रिभुवन विश्वविद्यालयबाट सम्बन्धन प्राप्त करिब ४५० सामुदायिक क्याम्पसमध्ये मदन भण्डारी मेमोरियल कलेज उत्कृष्ट दशभित्र पर्ने प्रतिष्ठित शैक्षिक संस्था रहेको उल्लेख गर्नुभयो।

क्याम्पस प्रमुख बाबुराम अधिकारीले कलेज स्थापनादेखि हालसम्म सञ्चालन गरिएका शैक्षिक तथा प्रशासनिक गतिविधिबारे जानकारी गराउनुभएको थियो।