काठमाडौँ, १४ असार : बुङ्मतीको प्राचीन सभ्यता, नेवारी कला–संस्कृति र विभिन्न समुदायबीचको सहअस्तित्वलाई केन्द्रमा राखेर निर्माण गरिएको चलचित्र ‘भागदौड’ यही असार २६ गतेदेखि देशभर प्रदर्शनमा आउने भएको छ।

चलचित्रका अभिनेता विशाल पोखरेलले परम्परागत मूल्य–मान्यता र आधुनिक जीवनशैलीबीचको सन्तुलनलाई कथावस्तुमा समेटिएको बताउनुभयो। चलचित्रमा प्रहरीको भूमिका निर्वाह गरेका उहाँले यो पात्र आफ्नो बाल्यकालदेखिको सपना साकार भएको अनुभवसमेत सुनाउनुभयो।

“पहिलो पटक प्रहरीको भूमिकामा अभिनय गर्ने अवसर पाएँ। सानैदेखि प्रहरी बन्ने चाहना थियो, चलचित्रमार्फत त्यो सपना पूरा भएको महसुस गरेको छु,” उहाँले भन्नुभयो।

पोखरेलका अनुसार प्रहरीको चरित्र नै आफू चलचित्रमा आबद्ध हुनुको मुख्य कारण बनेको हो।

हिमाल उप्रेतीको लेखन तथा निर्देशनमा बनेको चलचित्रमा विशाल पोखरेलसँगै अनिशा श्रेष्ठ, घनश्याम जोशी, शारदा राई (सारा), शेखर चापागाईं, देशभक्त खनाल, लक्ष्मी गिरी, शङ्कर महर्जन र सुवास तिमिल्सिनालगायत कलाकारको अभिनय रहेको छ।

चलचित्रका प्रस्तुतकर्ता विश्वराम विष्टले मनोरञ्जनसँगै सामाजिक सन्देश दिने उद्देश्यले चलचित्र निर्माण गरिएको बताउनुभयो। दर्शकको रुचि र अपेक्षालाई ध्यानमा राख्दै निर्माणमा कुनै सम्झौता नगरिएको उहाँको भनाइ छ।

चलचित्रमा अङ्गिरा थापा कार्यकारी निर्माता रहनुभएको छ भने भूपेन्द्रकुमार खड्का, सागर पुरी र सुरेश गिरी सहनिर्माताका रूपमा आबद्ध हुनुहुन्छ।