काठमाडौं । ‘सेतो धरती’को सफल प्रदर्शनपश्चात् कान्तिपुर फिल्म एकेडेमीको कान्तिपुर थिएटरमा आजबाट नयाँ नाटक ‘महाभारत’ मञ्चन सुरु हुँदैछ। यस नाटकबाट चर्चित हास्यव्यंग्य कलाकार मनोज गजुरेलले पहिलोपटक नाट्य अभिनयमा डेब्यु गर्दैछन्।

नाटकमा गजुरेलका साथमा वरिष्ठ कलाकार तथा निर्देशक रमेश बुढाथोकी र सुवर्ण थापाको प्रभावशाली अभिनय रहनेछ। यसका अतिरिक्त सन्दीप श्रेष्ठ, प्रतीक चौधरी, सुपज्ञा शर्मासहित अन्य २० जना कलाकारहरूलाई मञ्चमा देख्न सकिनेछ।

भारतीय लेखक कुलदीप कुणालद्वारा लिखित यस नाटकलाई नवीन भट्टले नेपाली रूपान्तरण, डिजाइन तथा निर्देशन गरेका हुन्। प्रकाश दाहालले अनुवाद गरेको यस नाटकको सेट डिजाइन तुफान थापा र लाइट डिजाइन दीपेश गजुरेलले गरेका छन्। त्यसैगरी, सङ्गीत संयोजन तथा गायनको जिम्मा अनुप तिमिल्सिनाले लिएका छन् भने कोरियोग्राफी अनिष क्षेत्री र निर्माण रमेश पुरीले गरेका छन्।

आगामी असार ७ गतेसम्म चल्ने यो नाटक हरेक हप्ताको बुधबार बाहेक दैनिक साँझ ५:१५ बजे मञ्चन हुनेछ। सार्वजनिक बिदाका दिनहरूमा भने दिउँसो १:१५ बजे अतिरिक्त शोको व्यवस्था गरिएको छ। दर्शकका लागि ५०० र १००० रुपैयाँको टिकट दर तोकिएको छ भने विद्यार्थीहरूले सीमित कोटा अन्तर्गत ३०० रुपैयाँमै नाटक हेर्न पाउनेछन्। टिकट बुकिङ कान्तिपुर थिएटरको आधिकारिक वेबसाइट र सामाजिक सञ्जालमा उपलब्ध लिंकमार्फत गर्न सकिनेछ।

यसअघि रेखा थापा, जीवन लुइँटेल, सनिशा भट्टराई र बेनिशा हमाल जस्ता चर्चित अनुहारलाई लिएर ‘मीरा’, ‘शिरीषको फूल’, ‘महारानीको जात्रा’ र ‘सेतो धरती’ जस्ता सफल नाटकहरू मञ्चन गरिसकेको कान्तिपुर थिएटरले ‘महाभारत’पछि सुविन भट्टराईको लोकप्रिय उपन्यास ‘समर लभ’मा आधारित नाटक ल्याउने घोषणा पनि गरिसकेको छ।