लुम्बिनी, १३ असारः प्यूठानको स्वर्गद्वारी नगरपालिकाका उपप्रमुख मीनराज रानाको सवारी दुर्घटनामा मृत्यु भएको छ।

जिल्ला प्रहरी कार्यालय प्यूठानका प्रहरी नायब उपरीक्षक (डीएसपी) नरहरि अधिकारीका अनुसार उपप्रमुख रानाले आज नगरपालिकाको लु.प्र.०१–००१ झ ०००८ नम्बरको बोलेरो पिकअप आफैँ चलाएर स्वर्गद्वारीबाट धनवाङतर्फ जाँदै गर्दा दुर्घटना भएको हो।

स्वर्गद्वारी नगरपालिका–२ बाङ्गेसाल सडकखण्डको ‘जिपखाल’ भन्ने स्थानमा गाडी अनियन्त्रित भई सडकबाट करिब ४०० मिटर तल खसेको प्रहरीले जनाएको छ।

दुर्घटनापछि क्रेनको सहायताले गाडी निकालिएको र गम्भीर घाइते भएका उपप्रमुख रानालाई उद्धार गरी उपचारका लागि भिङ्ग्री अस्पताल पुर्‍याइएको थियो। उपचारकै क्रममा स्वास्थ्यकर्मीले उनलाई मृत घोषणा गरेका डीएसपी अधिकारीले जानकारी दिनुभयो।