जुम्ला, १३ असार — वर्षौंदेखि सडक निर्माणको काम अलपत्र पार्दै आएका १६ वटा रुग्ण ठेक्का अन्त्य गर्ने प्रक्रिया जुम्लास्थित सडक डिभिजन कार्यालयले अघि बढाएको छ।

कार्यालयले सार्वजनिक सूचना जारी गर्दै कालिकोट, जुम्ला र मुगु जिल्लामा सञ्चालनमा रहेका १६ वटा सडक निर्माण ठेक्का सम्झौता रद्द गर्ने सम्बन्धमा १५ दिने सूचना प्रकाशित गरेको हो। ठेक्का सम्झौता भए पनि लामो समयसम्म निर्माण कार्य सम्पन्न नभएपछि कानुनी प्रक्रिया अघि बढाइएको सडक डिभिजन कार्यालयका सूचना अधिकारी सौरभकुमार सिंहले जानकारी दिए।

रद्द प्रक्रियामा परेका ठेक्कामध्ये १२ वटा कालिकोट, तीन वटा जुम्ला र एउटा मुगु जिल्लाका हुन्। यी आयोजनाहरू आर्थिक वर्ष २०७४/७५ देखि २०८२/८३ सम्म विभिन्न समयमा सम्झौता गरिएका थिए।

सडक डिभिजन कार्यालयका प्रमुख श्रवणकुमार महतराका अनुसार निर्माण व्यवसायीलाई पटक–पटक लिखित तथा मौखिक रूपमा काम सम्पन्न गर्न आग्रह गरिए पनि बेवास्ता गरेपछि सार्वजनिक खरिद ऐनअनुसार ठेक्का सम्झौता अन्त्य गर्ने निर्णय गरिएको हो।

ठेक्का रद्द भएसँगै सम्बन्धित निर्माण व्यवसायीलाई कालोसूचीमा राख्ने, कार्यसम्पादन जमानत तथा धरौटी जफत गर्ने, पेस्की रकममा १० प्रतिशत ब्याजसहित असुल गर्ने र बाँकी निर्माण खर्चसमेत सरकारी बाँकीसरह असुलउपर गर्ने प्रक्रिया अघि बढाइने कार्यालयले जनाएको छ।

यसअघि पनि कर्णाली राजमार्गअन्तर्गत अलपत्र परेका १० वटा रुग्ण सडक आयोजनाको ठेक्का रद्द गरिसकेको सडक डिभिजन कार्यालयले जनाएको छ।