वाशिङटन, १५ असार : अमेरिका र इरानले तत्कालका लागि एकअर्कामाथिको सैन्य आक्रमण रोक्ने सहमति गरेका छन्। साथै, मध्यपूर्वमा बढ्दो तनाव अन्त्य गर्ने उद्देश्यले दुवै पक्षबीच कूटनीतिक वार्ता निरन्तर अघि बढाउने सहमति भएको अमेरिकी अधिकारीले जानकारी दिएका छन्।

अमेरिकी अधिकारीका अनुसार जुन १७ मा भएको संवेदनशील समझदारीपत्र कार्यान्वयनमा रहे पनि पछिल्ला केही दिनमा दुवै देशले एकअर्कामाथि आक्रमण गरेका थिए। फेब्रुअरीको अन्त्यदेखि सुरु भएको द्वन्द्वले विश्वकै महत्वपूर्ण समुद्री मार्ग हर्मुज जलडमरु हुँदै हुने अन्तर्राष्ट्रिय ढुवानीमा समेत असर पारेको थियो।

समझदारीअनुसार इरानले हर्मुज जलडमरुबाट व्यावसायिक जहाजहरूको सुरक्षित आवतजावत सुनिश्चित गर्ने प्रतिबद्धता जनाएको छ भने अमेरिकाले इरानी बन्दरगाहमाथिको नाकाबन्दी हटाउने सहमति गरेको बताइएको छ।

"समझदारीका सबै पक्षमा प्राविधिक तहको वार्ता जारी रहनेछ। हालका लागि दुवै पक्षले सैन्य हमला रोकेका छन् र समुद्री यातायात सामान्य रूपमा सञ्चालन हुन सक्ने अवस्था बनेको छ," अमेरिकी अधिकारीले एएफपीलाई इमेलमार्फत बताएका छन्।

वार्ताको मिति र स्थानबारे औपचारिक जानकारी नदिइए पनि दुई अमेरिकी अधिकारी र एक जानकार स्रोतलाई उद्धृत गर्दै एक्सिओसले मंगलबार कतारमा वार्ता पुनः सुरु हुने जनाएको छ। सीएनएनले पनि ट्रम्प प्रशासनका एक अधिकारीलाई उद्धृत गर्दै दोहामा थप छलफल हुने र त्यसअघि दुवै पक्षले आक्रमण स्थगित गर्ने सहमति भएको उल्लेख गरेको छ।

यसबीच अमेरिकी राष्ट्रपति डोनाल्ड ट्रम्पले इरानले आक्रमण जारी राखेमा अमेरिका पुनः सैन्य कारबाही गर्न बाध्य हुने चेतावनी दोहोर्‍याएका छन्। शनिबार उनले आवश्यकता परे युद्ध पुनः सुरु गरिने र त्यसो भए इरानको अस्तित्व नै संकटमा पर्न सक्ने अभिव्यक्ति दिएका थिए।

पाकिस्तानको मध्यस्थतामा युद्ध अन्त्य गर्ने समझदारीमा हस्ताक्षर भए पनि त्यसपछि अमेरिका र इरानले एकअर्कालाई युद्धविराम उल्लङ्घन गरेको आरोप लगाउँदै प्रतिआक्रमण गरेका थिए।

आइतबार बिहान भएको पछिल्लो घटनामा अमेरिकी सेनाले व्यावसायिक जहाजमाथि इरानी आक्रमण जारी रहेको दाबी गर्दै इरानका १० सैन्य लक्ष्यमा आक्रमण गरेको जनाएको थियो। त्यसको प्रत्युत्तरमा इरानले कुवेत र बहराइनस्थित अमेरिकी सैन्य शिविरलाई निशाना बनाएको जनाएको छ।