काठमाडौँ, १४ असारः काठमाडौँ उपत्यकामा पछिल्लो २४ घण्टामा सवारी नियम उल्लङ्घन गर्ने एक हजार ९२२ चालकलाई ट्राफिक प्रहरीले कारबाही गरेको छ। उक्त कारबाहीबाट राज्यकोषमा रु पाँच लाख ११ हजार ५०१ राजस्व सङ्कलन भएको छ।

काठमाडौँ उपत्यका ट्राफिक प्रहरी कार्यालयका अनुसार कारबाहीमा पर्नेमा मादकपदार्थ सेवन गरेर सवारी चलाउने ९२, नियमविपरीत ‘राइड सेयरिङ’ गर्ने ७८, ट्राफिक सङ्केत बत्ती उल्लङ्घन गर्ने १२९ तथा तीव्र गतिमा सवारी चलाउने १३९ चालक रहेका छन्।

त्यसैगरी, लेन अनुशासन पालना नगर्ने ४१, निषेधित क्षेत्रमा हर्न बजाउने ६७, कालो सिसायुक्त सवारी सञ्चालन गर्ने १०, एकतर्फी सडकमा सवारी चलाउने ७० तथा अन्य विभिन्न ट्राफिक नियम उल्लङ्घन गर्ने एक हजार २९६ चालकलाई पनि कारबाही गरिएको कार्यालयले जनाएको छ।