काराकास (भेनेजुएला), १४ असार : भेनेजुएलामा केही दिनअघि गएको दुई शक्तिशाली भूकम्पपछि अन्तर्राष्ट्रिय सहयोग तीव्र बनेको छ। हालसम्म २४ देशले मानवीय सहायता, विशेष उद्धार टोली तथा हजारौं आपतकालीन प्रतिक्रियाकर्मी परिचालन गर्दै विपद् व्यवस्थापनमा सहयोग गरिरहेका छन्।

शनिबार टेलिग्राममार्फत जारी विज्ञप्तिमा कार्यवाहक राष्ट्रपति डेल्सी रोड्रिगेजले हालसम्म ५२१ टन राहत सामग्री, ८६ वटा विशेष खोजी कुकुर टोली तथा दुई हजार ७४१ भन्दा बढी खोज, उद्धार र प्राविधिक सहयोगकर्मी भेनेजुएला पुगेको जानकारी दिनुभयो। उहाँका अनुसार विदेशी उद्धार टोलीहरू भेनेजुएली सुरक्षाकर्मी तथा प्राविधिक टोलीसँग समन्वय गरी प्रभावित क्षेत्रमा निरन्तर खोज, उद्धार र राहत वितरणमा सक्रिय छन्।

सीएनएनका अनुसार, राष्ट्रिय सभाका अध्यक्ष जर्ज रोड्रिगेजले बुधबार गएको विनाशकारी दुई भूकम्पका कारण हालसम्म कम्तीमा एक हजार ४३० जनाको मृत्यु भएको पुष्टि गर्नुभएको छ। साथै, तीन हजार २३८ जना घाइते भएका छन् भने तीन हजार १४२ परिवार घरबारविहीन बनेका छन्।

उद्धारकर्मीहरूले भग्नावशेषमा फसेका सम्भावित जीवित व्यक्तिको खोजीलाई निरन्तरता दिएका छन्। यद्यपि, महत्वपूर्ण उद्धार समय सकिँदै जानु, भारी उपकरणको अभाव र लगातार आइरहेका पराकम्पनका कारण अभियान चुनौतीपूर्ण बन्दै गएको छ।

बुधबार क्रमशः ७.२ र ७.५ म्याग्निच्युडका दुई शक्तिशाली भूकम्प गएपछि देशभर पटक–पटक पराकम्पन महसुस गरिएको छ। यसले उद्धार तथा राहत कार्यलाई थप जटिल बनाएको छ।

यस्तै, आइतबार युरोपियन–मेडिटेरेनियन सिस्मोलोजिकल सेन्टरले भेनेजुएलाको तटीय क्षेत्रमा ५.६ म्याग्निच्युडको अर्को भूकम्प गएको जनाएको छ। उक्त भूकम्पले आरागुवा तट नजिकको समुद्री क्षेत्रलाई प्रभावित गरेको थियो।

सीएनएनका अनुसार, भूकम्पको तीव्रता लोगारिदमिक म्याग्निच्युड स्केलमा मापन गरिन्छ, जहाँ प्रत्येक एक अंकको वृद्धि हुँदा ऊर्जा उत्सर्जन करिब ३२ गुणाले बढ्छ। यही कारण पहिलो भूकम्पपछि करिब ४० सेकेन्डमै गएको ७.५ म्याग्निच्युडको दोस्रो भूकम्पले ७.२ म्याग्निच्युडको पहिलो भूकम्पको तुलनामा धेरै शक्तिशाली कम्पन उत्पन्न गरेको थियो।