काठमाडौं, असार १३ – पछिल्लो २४ घण्टामा देशभर भएका विभिन्न विपद्जन्य घटनामा एक बालकको मृत्यु भएको छ भने १३ जना घाइते भएका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार यस अवधिमा देशभर २५ वटा विपद्का घटना भएका छन्। प्राधिकरणकी प्रवक्ता शान्ति महतका अनुसार बारामा खेलिरहेका एक बालकलाई सर्पले डस्दा उनको मृत्यु भएको हो।

उहाँका अनुसार २५ घटनामध्ये १२ वटा सर्पदंशका रहेका छन्। सङ्खुवासभा, बारा, नवलपरासी (पूर्व), कपिलवस्तु, कैलाली र कञ्चनपुरमा भएका सर्पदंशका घटनामा १० जना घाइते भएका छन्।

त्यसैगरी, बझाङमा पहिरोका कारण एक जना, दोलखामा जंगली जनावरको आक्रमणबाट एक जना तथा कास्कीमा आगलागीबाट एक जना घाइते भएका छन्।

प्राधिकरणका अनुसार यी विपद्जन्य घटनाबाट करिब दुई लाख ७७ हजार रुपैयाँ बराबरको आर्थिक क्षति भएको छ। साथै, घटनामा २२ वटा पशुचौपायाको पनि क्षति भएको जनाइएको छ।