सिन्धुपाल्चोकमा लागुऔषध सेवन गरी सार्वजनिक सवारीसाधन चलाएको आरोपमा दुई जना चालक पक्राउ परेका छन्।

जिल्ला ट्राफिक प्रहरी कार्यालय सिन्धुपाल्चोक र इलाका प्रहरी कार्यालय बाह्रबिसेको संयुक्त टोलीले बाह्रबिसे नगरपालिका–३ खुर्सानबारीस्थित अरनिको राजमार्गमा सवारी जाँचका क्रममा उनीहरूलाई नियन्त्रणमा लिएको हो।

पक्राउ पर्नेमा बाह्रबिसे नगरपालिका–६ का २४ वर्षीय युवराज सेवा र भोटेकोशी गाउँपालिका–१ का ३४ वर्षीय भगवान कार्की रहेका छन्। प्रहरीका अनुसार परीक्षणका क्रममा दुवैले लागुऔषध सेवन गरेको पुष्टि भएपछि उनीहरूलाई नियन्त्रणमा लिइएको हो।

प्रहरीले पक्राउ परेका दुवै जनाविरुद्ध लागुऔषध सेवनसम्बन्धी कसूरमा थप अनुसन्धान अघि बढाएको जनाएको छ।